來到嶺南食咩好

【來到嶺南食咩好】 作者：莊文龍

以前人地成日問我嶺南是咪有牛，我心諗你都嘟嘟嘟。但今日我寧願自己係一隻牛，咁我起碼喺南宿草地都仲有草食。加上每日望住頹Can煮唔熟嘅白灼無味伴碟菜，咁同食草有乜分別？牛牛係有靈性架，幫人耕田。高登有人話見到好多牛牛一車車咁送入去屠房，有好多隻流眼淚。佢地知就快俾人殺…真係好慘！睇到呢度我先知道「嶺南牛」原來係咁解。

所謂一命二運三風水，你入得來嶺南讀書，就注定你冇啖好食。無他，一切都係考驗，想你苦其心志餓其體膚，咁你先可以專心行學術、好博雅。二來你Reg到個靚嘅時間表又談何容易，得半個鐘嘅時間食飯，你唔走堂都咪諗住可以離開呢個荒蕪之地去食好野。三來附近得個富泰，你得一個鐘食飯嘅話，有麥當勞呢啲高檔美國野同貴得來味道一般嘅茶餐廳食已經算唔錯，再唔滿意你就只好去萬寧搵藥食。聽聞港大有十幾個餐廳，我驚嶺南子女出到去會比人叫Go back to your shit la!

想當年，早餐有糯米雞、午餐有豆腐花、午茶有炸雞籃，而家乜雞都冇得叫。今時今日，炸雞籃換做麥樂雞，雞同薯條都唔多，但仲貴過麥當勞！食個西多拼薯條，兩樣野放埋同一個碟，任由糖漿薯條如膠似漆相擁到老。有次排隊拎下午茶，薯條已經俾得少，但個Canteen姐姐仲同隔離個新人講：「薯條比太多再夾返啲走。」我真係喊出來。如果你話香港係美食天堂，我諗嶺南唔喺香港範圍之內。如果你票選最難食校Can而嶺南唔係前三，我諗你地冇諗過嶺南係一間大學。

曾經有人要爭取整個Starbucks喺NAB，計我話你爭取個麥當勞就更好，包你生意興隆、無病無痛、過三爆四、大吉大利！而家乜Starbucks都冇，連嶺南書店都執埋笠。雖然未到孔子「割不正不食」嘅地步，但如果每餐都喺Canteen一簞食一瓢飲，真係會好似顏淵咁有怪莫怪死得最快。

做個嶺南學生真係連便便都冇得食。人地問我嶺南大學係咪廣州果間我已經笑而不語，如果你仲要問我嶺南有咩好食，我真係唔知點算，我覺得我讀咗咁多年書都解答唔到呢個問題，真係名符其實嘅一舊垃圾。

廉頗老矣，嶺南飯否？

編按：我終於明白點解嶺大學生會logo有隻牛牛…